牛奶老師碎碎唸：8年同行的朋友

今日約咗一位好耐冇好好坐低食飯嘅舊朋友。

講起上嚟，我同 Kids.Garten 童樂教室 創辦人 琛琛老師，其實早喺師範嗰陣已經識。由當年一齊讀書、一齊傾教學、傾小朋友，到之後大家都行咗出嚟做自己嘅教育中心，轉吓眼，原來已經差唔多 8 年。

有時真係要見返面、坐低食餐飯、慢慢傾，先會突然發現：  原來有啲人，已經喺你條成長路上陪咗你好耐。

由師範開始的一段緣份

當年喺師範認識琛琛老師，大家都係對教育好有想法嘅人。

我哋成日會傾小朋友、傾課堂、傾點樣先可以令學習變得開心啲、自然啲。可能因為大家都唔太認同香港過份催谷嘅學習環境，所以一路以嚟，教育理念都好相近。

我哋都相信，小朋友唔係唔可以學習，亦唔係唔需要進步。  

但學習唔應該只係分數、進度同比較。

小朋友其實可以透過遊戲、故事、互動、陪伴同鼓勵，慢慢建立信心。當佢哋覺得自己係被理解、被接納，先會更加願意去嘗試。

後來，我哋都選擇咗教育創業，亦好榮幸可以有機會2024年合作搞新年活動。

唔係因為覺得創業好型，亦唔係以為自己可以改變成個教育制度。  

只係好簡單咁想喺自己能力範圍入面，俾小朋友多一個冇咁大壓力、可以安心學習嘅地方。

行落去先知，熱誠真係唔係萬能

以前成日以為，只要真心鍾意教育，就一定可以一直做落去。

但真係自己做落去，先知要做好一間教育中心、做好每一堂課，唔係有心就夠。

要諗課程、整教材、觀察每個小朋友嘅狀態、同家長溝通、處理中心大大小小嘅事。好多時日頭上堂，夜晚繼續備課；明明已經收咗工，電話訊息都仲係一路嚟 ，我哋兩個今日坐低傾都有講自己有試過同家長傾到凌晨一兩點。當然我哋都想做到收工就收工，我哋更想嘅就係做好啲，做足啲，做多啲。所以可以嘅話都會做足備課，秒覆訊息。

最吃力嘅位係，因為好想守住課堂質素，好多時真係好難放心將課堂交俾其他老師。

唔係唔信其他老師，而係有啲細節，真係要同小朋友相處耐咗先會知。邊個小朋友今日特別需要多一句鼓勵，邊個一急就會收埋自己，邊個表面好似冇事，但其實已經有啲唔開心——呢啲全部都係一堂一堂陪出嚟嘅。

所以有時明明人已經好攰，心入面都會諗：  「不如都係我自己上返啦。」

同家長溝通亦都係另一個好真實嘅位。

有時你本身只係想好好地同屋企人食一餐飯，但電話一響、訊息一嚟，見到家長擔心小朋友，又真係好難叫自己完全唔理。結果一餐飯食到一半，個腦已經開始諗點覆、點講、點幫。

明明係自己嘅私人時間，但又好似永遠都有大部分心力放咗喺學生身上。

做教育嘅人，好多時就係咁。  

唔係唔想休息，只係你知道，電話另一邊可能係一位好擔心嘅媽媽，或者一個需要幫一把嘅小朋友。

老師都係有血有肉嘅人。耐咗，真係會攰。

唔係唔再鍾意教育，而係慢慢明白：  

原來越在意一件事，就越容易將自己放到好後。

當老師成為媽媽

呢兩年，琛琛老師多咗一個好重要嘅身份——媽媽。

以前我哋多數係用老師嘅角度去睇小朋友。但當一位老師自己都做咗媽媽，對教育、陪伴同成長，應該又會有另一種更深嘅體會。

今日傾偈嗰陣，聽到佢講作為媽媽同老師之間嘅拉扯，即使我未做媽媽，但我都好有感觸。

因為做老師，有時真係好容易將學生放得好前。尤其係一個好上心、好負責任嘅老師，更加會不自覺咁將好多心力放喺別人嘅小朋友身上。

但偏偏有時，自己屋企嗰個最需要你嘅小朋友，反而會被放到後面。

呢件事講出嚟，其實有啲心酸。  

但我相信好多做教育、又同時做父母嘅人，都一定明。

做老師唔代表永遠有無限能量。  

做媽媽嘅老師，亦唔代表每一刻都平衡得好。

好多時，我哋只係一邊照顧好多小朋友，一邊學緊點樣唔好忘記自己屋企入面嗰個小朋友。

所以今日呢餐飯，對我嚟講唔只係同舊朋友見面。  

更加似係同一個一路都明白我點解仲喺度堅持嘅人，坐低傾吓，提醒大家：其實我哋都真係努力咗好耐。

8年同行，感恩有你

8 年，真係唔短。

由當年一齊讀師範，到後來各自做老師、做創辦人，再到今日仍然喺教育呢條路上努力。中間有開心、有滿足，亦有好多只有自己先知嘅辛苦。

有時候，身邊有一個人明白你點解咁堅持，其實已經好難得。

唔要解釋太多，大家都大概知道對方經歷過啲咩。  

唔需要成日見，但知道大家都仲喺度努力，已經覺得好安慰。

寫低呢篇文，唔係想講我哋有幾叻，亦唔係想將教育講到好偉大。

只係想記低，喺香港做教育，真係唔容易。  

但仍然有一啲人，願意用自己嘅方式，努力保留一個小朋友可以安心學、開心學、被理解嘅地方。

多謝琛琛，呢 8 年一直都喺呢條路上同行。

希望之後嘅路，就算唔一定輕鬆，我哋都仲記得自己當初點解開始。  

亦希望每一個小朋友，都可以喺被明白、被鼓勵、被愛錫嘅環境入面，慢慢長大。

惜童教育中心 創辦導師

牛奶老師 Iris Leung

歡迎大家追蹤我們的 Facebook 及 Instagram 專頁，留意最新課程資訊、課堂花絮及中心消息。  

https://www.instagram.com/chilrish_education.center?igsh=NDVmOHV3em43Y2Ru&utm_source=qr

https://www.facebook.com/ChilrishEducationCanter?mibextid=LQQJ4d