首頁 / 體驗分享 / 小朋友順數倒數成日撈亂？家長可以試嘅3個數數遊戲｜教學小分享

小朋友順數倒數成日撈亂？家長可以試嘅3個數數遊戲｜教學小分享

教學分享 person 惜童教育中心 Chilrish Education Center calendar_today 2026年10月16日 visibility 5

「由1數到10就識，一叫佢倒數，數數吓又變返順數。」

如果你都有遇過呢個情況，可以先放低「再背多幾次就識」嘅想法。今次不如換個方法，用玩具同小朋友一齊練習。

點解識順數，倒數時仍然會撈亂？

順數時，小朋友可能已經好熟悉「1、2、3、4、5」呢個次序。但倒數唔單止要記住數字，仲要轉換方向。

例如由5開始倒數，講到「5、4、3」之後，又順口接返「4、5」，就係今次想同家長分享嘅情況。

與其只提醒「你又數錯喇」，不如將數字變成眼前見得到嘅數量，一齊試吓「每次少一個」。

3個在家可以玩嘅順數倒數遊戲

1. 玩具車逐架開走

放3架玩具車喺枱面，先同小朋友一齊數有幾多架。

每次開走一架，就問：「而家仲有幾多架？」

唔使急住要求佢即刻答。可以一齊點數剩低嘅車，再繼續玩。熟習之後，先增加玩具車數量。

2. 積木加一粒，再減一粒

先放一粒積木，每次加一粒，一齊數有幾多粒。

之後反過來，每次拎走一粒，再數剩低幾多。

玩嘅時候，可以簡單講：「頭先有3粒，拎走一粒，而家有2粒。」將順數、倒數，同實際數量放埋一齊練習

3. 火箭倒數起飛

用紙筒或者雙手扮火箭，一齊喊：「3、2、1，起飛！」

先由短短嘅倒數開始，唔使一開始就挑戰由10倒數。等小朋友玩熟咗，再試吓由5開始。

數錯咗，家長可以點回應？

如果小朋友倒數時又變返順數，可以停一停，同佢講：

「我哋今次係每次少一個，一齊睇吓仲剩幾多。」

再用眼前嘅玩具陪佢數一次，唔使急住重頭考過。每次玩一小陣，亦唔需要將每個遊戲都變成問答練習。

用遊戲陪小朋友認識數字

我哋嘅思維探索啟發班，為2–5歲幼兒提供數學思維啟蒙，透過遊戲闖關同實物操作，讓小朋友接觸數字、數量同次序。

唔只練習背出數字，亦留空間畀小朋友自己試、自己發現。

惜童教育中心創辦導師

牛奶老師 Iris Leung

歡迎大家追蹤我們的 Facebook 及 Instagram 專頁，留意最新課程資訊、課堂花絮及中心消息。