《彩虹邨的一天：由動畫走入現實，找回童年的顏色與回憶🌈》

前幾日，我同Yuky帶住Ella同Riana，一齊去彩虹邨🌈，尋找我哋平台自己製作嘅AI卡通入面嘅取景地🎬。

出發之前，我同Ella講：「今日帶你去彩虹邨。」佢問我：「喺邊度嚟㗎？」我就問返佢：「你記唔記得之前卡通片有一集，有個地方好多顏色，好似彩虹咁？仲有隻貓貓飛上天空，拖住條彩虹？」佢即刻雙眼發光，興奮咁話：「我好想摸下條彩虹！」😆

出發嗰陣其實落緊大雨🌧️，我哋都有少少擔心會唔會影響行程。不過好彩天公造美，到咗現場竟然停咗雨。兩位小朋友好開心喺籃球場跑來跑去，佢哋見到有啲哥哥姐姐嚟打卡📸，仲主動「做推廣」，派紀念品俾人，完全進入狀態。😆

玩到攰，小朋友開始話肚餓😋。最開心嘅係，我哋真係搵到一間充滿懷舊感嘅冰室，即刻叫咗菠蘿包同紅豆冰🥯🍧。兩個小朋友食得津津有味。

食飽之後，我哋繼續探索彩虹邨。見到金魚舖🐟、漫畫店📚，仲有而家已經好少見嘅小食店😍真係童年回憶返晒嚟！

返到屋企，我再睇返啲相，突然諗起以前讀書嘅日子，最期待永遠係星期五放學，因為唔使趕住返屋企做功課，可以同同學去屋邨商場行下。有時會去M記買杯雪糕🍦，坐喺籃球場傾計；有時就係行文具店，睇吓啲文具啊精品啊，已經好開心! 後來唔記得中幾，屋邨隔籬個商場開咗間商務印書館📖，嘩！嗰度簡直變咗我哋嘅聚腳點。唔係為咗睇書，而係睇文具😆永遠都會問一句：點解啲文具可以咁靚㗎？!

呢啲當時睇落無無聊聊嘅畫面，原來過咗咁多年，依然記得好清楚😌。

或者，童年本來就應該有啲「無聊」嘅時光。喺香港讀書，多多少少都有啲壓力；而家嘅小朋友更加行程緊密，放學之後仲有各式各樣嘅興趣班。但如果佢哋可以有一啲空白時間，同朋友一齊發呆、傾計、做啲冇目的嘅事——可能正正就係喺呢啲時刻，佢哋先會慢慢發現，真正屬於自己嘅夢想✨。

有興趣睇我哋呢一集卡通嘅朋友，可以click下面條link睇下👀🎬

https://youtu.be/F7wU04Q-ff4?si=aYo-DPVuFZ8_SezB