帶住個女返工， 認識復康朋友們的工作

今日一早， 我帶住浠浠去咗 田景賽馬會日作坊， 因為我哋近啲玩會把我哋嘅禮品包裝任務交給復康的朋友們， 所以今日我哋有機會上去了解吓環境， 包裝嘅過程， 同埋復康朋友們他們每一日係點樣工作. 這是對小朋友的另一個好重要的課程.

因為入邊不方便拍攝， 所以都冇影得到太多相.

但係今日去了解到嘅係，復康朋友其實都可以好似大家咁樣工作， 在日作坊入邊， 有賣小食嘅士多， 收銀服務完全沒有問題.  他們可以在廚房整蛋撻， 鳳梨酥， 不同嘅食品，仲有洗衣房， 包裝間， 扭扭花製作， 木製工藝品製作， 工友們完全投入其中， 各自做不同類型的工作. 

最震撼我嘅， 係有兩位朋友， 佢哋兩個具有好高嘅藝術天份， 可以喺好短嘅時間入邊用Procreate 畫到好靚嘅畫作， 然後呢個畫作可以製造成木製成品！

社工哥哥今日每一個區域都同我哋一樣介紹， 每一區嘅工友們都係咁同我哋打招呼say Hello， 浠浠好好笑係咁同佢哋say Hello， 仲叫佢哋加油努力. 好叻啊！ 嗰啲手作整得好靚呀. 

同工友們努力溝通.  

我哋近啲玩，嚟緊會同田景賽馬會日作坊舉行每一季一次的體驗工作坊， 透過包裝， 烹飪， 做手工藝， 等小朋友與康復朋友接觸， 讓他們認識其實每個人都係一樣嘅， 沒有分別， 只要每一個人用心做好自己的角色， 發揮自己所長， 生命同樣綻放光芒. 

大家又會唔會同小朋友一齊參加咁有意義嘅活動呢？