給小朋友一個選擇
「大家好，近日見到咁多關於小朋友輕生嘅新聞，我的心好痛。作為一個母親，我想分享我自己女兒嘅故事。
我個女 Nicole 中四嗰年，學校由網課轉返實體課，為咗追進度，學校編排咗一個好密集嘅時間表：一星期五日，有四日都要上3個2.5小時嘅3連堂，即係一個星期要上十二個長課堂。佢好辛苦，但真正令佢想離開嘅，唔單只係這種壓力。
學期初她主動跟我說要離開她原本很喜歡的學校。
我問佢：『點解你咁想離開學校？』
佢答我：『因為我覺得喺學校學唔到嘢。個個同學都係出去補習，咁我返學做咩(她從小没補習？』
就係呢一句話，令作為老師的我好好反思教育嘅初衷。佢唔係懶，唔係怕辛苦，佢係覺得學校嘅教學已經滿足唔到佢。
嗰陣時我諗，與其逼佢返去一個佢學唔到嘢嘅地方，不如我帶佢去一個佢鍾意嘅地方。Nicole 細個學過日文，佢又鍾意日本文化，於是我決定帶佢去日本，俾佢喺一個佢鍾意嘅環境入面學習同沉澱，之後再返香港重讀中四都未遲。
就係呢個決定，令我發現咗一個香港家長好多人都唔知嘅嘢。
返到香港之後，我本來諗住俾佢重讀中四。但係我發現 Nicole 嘅英文能力其實好好，於是我開始搵資料，睇吓有冇其他方法。就係嗰陣時我先知道——原來 IELTS 嘅年齡限制唔係全球劃一！
喺香港，因為商業決定，佢哋話要16歲先考得。但係我去咗日本之後先發現，原來日本嘅制度係11歲就可以考 IELTS。我之前一直以為呢個係全球劃一嘅規定，但原來唔係——呢個只係香港嘅限制，而唔係 IELTS 本身嘅限制。
所以我哋即刻喺日本幫佢報考。嗰陣時，佢只係得15歲——如果留喺香港，佢要等到16歲先考得；但因為我哋去咗日本，佢就考了 IELTS 。
佢得到的成績令我有勇氣做一個決定：與其要佢重讀中四，不如直接俾佢讀中六。
呢個唔係因為佢特別叻，而係因為我發現咗一個好多家長都可能唔知道嘅事實：有啲嘢唔係「冇得考」，而係「喺呢個地方冇得考」。 如果你識得去另一個地方，原來條路係行得通嘅。
之後佢用一年半完成 DSE，然後去咗埃及做一年文化交流，成為亞洲唯一一個被派去埃及嘅交換生。而家，佢準備入讀英國大學考古學遙距課程，同時剛剛亦被選中參加荷蘭皇家學院喺意大利舉辦嘅考古田野學校考古field trip。
我分享呢個故事，唔係想話我嘅選擇係唯一正確嘅。我只係想講：當你嘅小朋友話你知佢學唔到嘢、或者佢好痛苦嘅時候，作為父母，我哋係可以選擇嘅。
我哋可以選擇聆聽，而唔係否定；
可以選擇去搵其他可能性，而唔係只係逼佢適應；
可以選擇相信制度之外仲有其他路。
